PANTUN (SISINDIRAN)

Comments: (0)
Piring pisin diragaji
Jajan cendol kalapaan
Abdi isin ku Pa Haji
Ngajak ngobrol kamalinaan

Artinya :
Merasa malu terlalu banyak ngobrol

Cikaracak ninggang batu
Laun-laun jadi legok
Tibubudak nungtut elmu
Mun kapayun moal kagok

Artinya :
Apabila dibiasakan dari sejak kecil menuntut ilmu dan selalu tampil ke depan dalam artian yang positif, maka sudah dewasa tidak akan menjadi kaku apabila disuruh apapun, umpamakan bila disuruh untuk berpidato.

Papatah ti indung tere
Sangkan badan teu sosoroh
Kuliah teu tenang hate
Dibaeudan ku kabogoh

Artinya :
Kuliah tidak bergairah karena pacar sedang memusuhi.

Dagang pais ti bubudak
Dironyok di sisi jalan
Hayang geulis loba wedak
Camohok lir careuh bulan

Artinya :
Saking banyaknya menggunakan bedak yang berlebihan, dari pada cantik malah sebaliknya.

Angeun nangka make asem
Wadahna daun kanyere
Teu kabita teu kasengsrem
Sumawona hayang dibere

Artinya :
Tidak merasa ada keinginan, diberi pun tidak mau.
Mangga Aos Salajengna >>.....

PUISI SUNDA : AWEUHAN NU CAN KASORANG

Comments: (0)
Aya carita anu can tamat
Ah, da memang carita hirup rek iraha tamatna
Pan amparan jagatna oge can dipungkas
Ari kahayang mah lalakon teh geus lekasan
Geus bosen ningal pamilon nu igel-igelan
Di luhur panggung kahuripan, kasarakahan
Anu caritana loba rekaan
Direka ku lobana kahayang anu can kasorang


Enya kahayang mah lalakon teh geura enggeusan
Ending-na pikabungaheun jeung pinuh ku pangharepan
Tapi lalakon teh bet asa nambahan
Caritana tambah euyeub ku paneka, pinuh ku pangropea
Luka-liku dina catur nu kadang tanpa bukur
Dibungkus dina paket-paket episode
Disambung-sambung ku kalbu najan teu parok, sarta tetep teu nyambung
Diperenah-perenah dina manah, najan teu saluyu, sabab tema nu dibawa lain amanah.

Atuh kumaha da kahayang teu bisa dipungpang
Numawi lalakon kudu terus manjang
Enya teu nanaon, tapi kahayang kudu didadasaran ku luang
Sangkan ngarti tur surti papada urang
Emprona hirup teu asal senang
Ngudag-ngudag luang jeung daluang
Tapi panungtunganana ukur dipungkas ku lambaran uang

Hirup asa loba nu can kasorang
Teu sadar aweuhan anu can kasorang
Taya lian hirup di alam pawenang
Mikir tingtrim di alam langgeng
Ti ayeuna, samemeh srangege lingsir ngulon
Samemeh waruga nyangirah ngaler
Samemeh sukma ditanya perkara ngangler
Samemeh bugang ngababatang
Di pajaratan patunjang-tunjang

Ya Robbi...abdi sumerah
Waruga jeung sukma asal ti Anjeun
Jaga balik deui ka Anjeun

Ya Robbi, abdi lahir dina raga jeung sukma nu suci
Balikkeun deui abdi dina panungtungan napas anu murni
Dina lalakon nu pinuh ku kahayang
Kahayang anu luyu jeung piwulang

Piwulang Anjeun nu mawa senang di alam pawenang
Diwuwuh piwuruk Anjeun nu nungtun hirup suhud Naratas lampah pikeun nyorang bagja
Di alam nu taya tungtung
Henteu linglung sabada episode carita hirup urang diitung-itung


Haliwung ti Tutugan Gunung Tambaguruyung 16 Oktober 2010
Mangga Aos Salajengna >>.....

PUISI SUNDA : DINA WANCI PEUTING

Comments: (0)
Dina wanci peuting anu jempling
Aya dangding nu teu weleh ngagalindeng
Marengan gelikna batin nu teu weleh rungsing
Ngabarungsinang asa teu pernah manggih beurang
Teu kalis mepende hate nu tara tibra sare, lantaran pinuh kacape


Dina peuting nu teu weleh jempling
Aya gerecekna sora keyboard
Patarema jeung rema-rema nu galecok cumarita, najan taya soara
Dibarengan ku sumanget nu rohaka
Nincak dina jalan satapak, ngudag impian nu mokprok dina kongkolak


Unggal wanci peuting dina kaayaan jempling
Taya sasaha, taya nu mirosea
Ngan hiji batur kuring, nu unggal peuting nembongan
Sanajan ukur dina wangunan tutulisan
Kabarung hate nu gandrung kabiruyungan, hayang tepung sosonoan
Kapiasih nu ngait meulit, tur nyantel teu kendat najan kudu meuntas wates pajaratan

Iwal peuting jempling nu teu weleh jadi pangeling-ngeling
Nungtun lengkah geder kifayah najan lain wayah
Teu ilahar tapi lumrah, lantaran kalimpudan ku rasa kanyaah
Enya kituna teh saban peuting anu jempling
Dibarengan ku kingkilaban nu datang kalan-kalan
Cenah tong diteang, tong diwawaas
Carita geus ditutup ku kalimah pamungkas
Tapakna geus laas karuruban ku kararas

Dina wanci peuting anu jempling
Sok rajeun hayang napak tilas
Sugan aya kolebat najan sakolepat
Nepungan buah ati nu kungsi sawelas taun dipupusti
Dina kamalirna hurip nu teu weleh sedih kingkin
Lain hayang neang mangsa nu geus lewang
Tapi nu dipalar geusan ngubaran rasa longkewang

Dina wanci peuting anu nyedek ka janari
Rarasaan asa poe kamari
Katompokeun, kabebenjokeun ku kalangenan nu sasari
Enya harita ge geus nincak janari
Gebeg,...hanca masih tilu bab deui
Sedeng isuk-isuk geus dianti
Ulah kasambut ku datangna srangenge, nu baris mencrong surti jeung ngarti
Tara sulaya mancerkeun cahya, nyaangan lengkah kasab waragad transfusi
Kasab leutik diiwit-iwit nyubayaan budak nu ririwit
Enya, eta mah lalakon mangsa harita
Da ayeuna mah buah atina geus taya dikieuna

Dina unggal peuting jempling nu ayeuna
Rema-rema masih angger cumarita
Teu karuhan bisa ngareureuhkeun gerecekna keyboard
Najan tema jeung caritana geus beda
Tapi cipanon mah satia marengan lewangna rasa
Tiis lantis minuhan suku nu geus karuru
Kalangsu sabab geus teu puguh nu dituju
Ngoleab kabawa poekna peuting, nu ngaringkeb mawa kasedih
Ngabibita rasa kanyaah nu harita kabawa caah, karurud dina ulekan musibah

Peuting terus beuki jempling
Marengan gidigna ati, maripih lamping nu lungkawing
Mapay-mapay raratan kaheman sugan amprok na impian
Disorang sugan tinekanan, najan sadar lengkah asa sakaparan-paran
Tapi diri yakin, masih tetep aya dina tatapakan
Batin lumengis ngajerit kanu ngan hiji, Nu Maha Suci
Waruga ngarakacak, sukma muntang pageuh ka Mantenna

Peuting nu jempling geus parat nepi ka wanci janari
Anjog patepung jeung hibarna fajar
Enya teu lila, aya hawar-hawar sora adzan
Ngahudangkeun pangacian, sangkan tong kamalinaan ngumbar panglamunan
Geura tepungkeun eta impian jeung pangharepan
Dina luhur pangsujudan

Lamping Gawir Kumetir, 06-02-2010
Mangga Aos Salajengna >>.....

PUISI SUNDA : DINA WATES BURUAN

Comments: (0)
Dina wates hiji buruan
Na iuh-iuh panyaweran
Diri cicing, nangtung nangtang panglamunan
Nyoreang nyawang lampah nu pernah kasorang

Di dieu dina wates buruan anu ieu
Ngagurat aya carita
Ngagalura paamprokna kasono
Repok dina tatapakan kalimah nu direka
Taya aling-aling deui nu dipikarisi
Sabab geus jadi hariring nu pernah dipasinikeun dina ati

Enya di dinya dina wates buruan
Guratna carita harita
Ngagalura lir motahna sagara, sajeroeun dada
Tapi teu lila
Da jadi simpe
Salin jinis ku geter hate
Nu ngan ukur galindeng ati midangdam kahayang
Dipapande dipataremakeun jeung rasa kaheman
Enya jadi ukur lamunan

Enya di dieu pisan dina wates buruan
Diparipih deui sugan aya pasini nu kungsi ngancik, dapon saeutik
Nu pernah mawa beja, najan hawar-hawar
Nyandingkeun deui dua tatali rabi
Dipatri ku rasa surti
Diais ku lamping asih
Digelindengkeun dina wangunan dangding
Anu bihari dijangjikeun bakal jadi milik urang duaan

Tapi di dieu dina wates buruan
Kiwari tinggal implengan
Ngawujud tulisan anu ngan ukur milik diri sorangan
Tulisan nu geus taya komaraan
Geus taya deui soraan
Sabab karuang ku lemah pangharepan

Enya di dieu masih dina wates buruan
Dina iuh-iuh panyaweran
Dina puhu-puhu panineungan
Kuring masih nangtung, tetep nyorangan

Tutugan Gunung Tambaguruyung, 02-02-2010.
Mangga Aos Salajengna >>.....

PANTUN (SISINDIRAN)

Comments: (0)
Sisindiran
Ku : Asep P. Kurnia

Pager endah ku baluntas
Sisi jalan ka Cibodas
Kuliah ka universitas
Ngaronjatkeun ajen jeung kualitas

Maksudna :
Keur nu soson-soson nyuprih elmu di paguron luhur, kalayan tujuannana ngaronjatkeun kualitas. Tangtuna lain sakadar ngudag ijazah.

Lain lantung tambuh laku
Ngalengkah nyiar kifayah
Abdi tekun maca buku
Kuliah tambah gairah

Maksudna :
Kalawan tekun maca buku, kuliah jeung diajar moal karasa hese, malahan tambah gairah.

Lauk emas ngakan ganggeng
Disamberan ku japati
Boga emas moal langgeng
Teu cara boga pangarti

Maksudna :
Harta banda mah keuna ku beak, lain deui mun boga elmu, sarta elmu mah moal keuna ku beak.

Salayang sabrang salayang
Ka imah ngadon rek ngarih
Kuliah datangna beurang
Kumaha atuda tebih

Maksudna :
Alesan keur nu sok kabeurangan kuliah, lantaran didugdag jauh.

Ti Garut oleh-olehna jeruk
Saledri ti Cisondari
Unggal poe elmu dicukcruk
Geus ngarti percaya diri

Maksudna :
Kudu daek tekun nyukcruk elmu unggal poe unggal waktu, sabab mun geus kapimilik, pinasti ngarti jeung percaya diri.
Mangga Aos Salajengna >>.....

TUKANG LAHANG JEUNG RANDA NGORA

Comments: (0)
Cumarios perkawis politik, ah kanggo abdi mah di luar kapasitas. Kagugah ku seueurna info rekan fb anu nyeratkeun pandangan politikna ‘lieur’, namung seueur oge anu nyawalakeun sual pulitik atanapi politik. Ongkoh lieur, tapi digugulung. Enya da memang kedahna kitu. Malih di nagara majeng mah kedah dijentrekeun perkawis pandangan politik teh. Bade mihak ka partey ‘Abah’, bade milih partey ‘Babeh’, atanapi bade ngarojong ka partey ‘Cunihin’. Namung upami sikep urang bade netral mah tangtos nyantumkeun status ‘non partisan’. Eta teh diperyogikeun dapon urang katawis pamadeganana, sareng komitmenna. Numutkeun ajaran Islam oge, juntrungna nagara atanapi tatanan kamsyarakatan teh kedah disarengan ku gerakan politik, disebatna ‘siyasah’. Namung tangtos panginten siyasahna ‘Siyasah Islamiyah’ anu teu ngarugelkeun sadayana pihak. Ulah kajantena sapertos fenomena politik di ‘Republik Mimpi’. Ku urang pan katangen, fenomena politik di Republik Mimpi mah, bet aya padamel biasa golongan III/A namung tiasa ngokod artos dugi ka trilyunan rupiah. Ruarrrr binasa…!

Pendidikan politik bagi setiap warga negara, sangat diperlukan dalam rangka membangun negara yang madani, kokoh, dan demokratis. Waduh mani asa ilmiah. Punten ah, abdi mah sanes pakar politik, hehehe. Pribados teu patos paos bade cumarios perkawis mafia pajakna Agan Yuyus, hebohna skandal Ceu Sulastri, atanapi pengemplang pajak anu ditudingkeun ka perusahaan Grup Bakery, sareng nu sanesna. Keun bae eta mah bagean pakar-na. Urang mah bati ceuleumeut, bati olohok bae.

Kamampuan politik pribados mah, mung sabudeureun kampung padumukan. Ari cariosna mah dilakonan ku Abah Olot anu padamelan sadidintenna dagang lahang, sareng Nyi Denok bentang kampung randa demplon. Ari Abah Olot, teuing ku cunihin, teu kaop ningal anu donto, karepna sok nyoso jero. Sedengkeun ari Nyi Denok, anu tos tujuh taun lalagasan, kari-kari kiwari rada cumentil. Kituna teh ti saprak ka lembur eta, aya duda gandang dedeg sampe rupa hade, pindahan ti kota, ngagaleuh bumi agreng tilas juragan kontrak. Katara eta duda ganteng teh jalmi nyondong, da mobilna oge katawis aya limana. Unggal kaluar teu weleh nganggo kaca soca hideung. Duka kirang ningal, duka socana cileuhan bae. Hehe deui…

Bet tara-tara ti sasari, Nyi Denok sering ngalangkung ka payuneun eta bumi. Sok kantenan pami bade ka warung ngagaleuh tarasi, ngahaja tebih ge nguriling, dapon tiasa papendak sareng engkang duda. Mung hanjakal si engkang teh sikepna biasa-biasa bae, najan paadu teuteup teu nembongkeun rasa kataji ku denokna Nyi Denok, seuri ge saukur puraga tamba kadengda, bubuhan jeung papada tatangga, panginten.

Nyi Denok kuciwa. “Palangsiang aing kurang nyari.” Keretegna. “Atawa boa awaking henteu seungit cara wanoja-wanoja urang kota”. Hatena terus noroweco. Kaya kieu mah cenah, aing kudu getol mandi isuk-isuk.  Kalayan paniatan eta bener dilaksanakeun, turta unggal wanci carangcang tihang inyana geus nguprek di tampian sisi pasir kebon kawung.

Kacarioskeun Abah Olot si tukang lahang, sihoreng gawena harita ngukuntit petana Nyi Denok, maksud nangenan kalakuan nyi randa sapada harita (pan kitu nya ari dina dunia politik mah sok silih intel kalakuan masing-masing, tujuan neangan kalemahan, pikeun silih ragragkeun, silih gubragkeun, silih jongklokkeun).

Nalika Abah Olot, katangen ngintil Nyi Randa demplon, ieu carita dipungkas heula mangrupi episode pertama, kumargi ki dalang kabujeng tunduh. Cag heula!***
Mangga Aos Salajengna >>.....